·
Slasher唔使下下講追夢講熱血。
七年前我辭咗全職，開咗間工作室做Slasher。身邊朋友都覺得我好勇好熱血。老實講，我從來都覺得Slasher只係一個職業選擇，冇咩咁特別。我只係做我鐘意做嘅嘢，順便用嚟謀生，僅此而已。要講追夢講熱血，我反而有啲覺得肉麻。與其將自己擺得咁高，我更加傾向直接認咗佢，「我只係覺得好玩，唔做依家嘅嘢都唔知做咩好」。
七年一路走來，有教做運動、有出表演、有搞活動，到依家出埋Board Game。每日都做嘢，但冇一日係返緊工。出Board Game嘅呢段歷程，最深刻就係發覺無論識同唔識，都有好多人支持我哋，多謝大家。我依然相信，相比睇人仆街，其實我哋更鐘意睇人成功。只要你畀人感覺到作品有用心、有Care其他人、希望做一啲好嘅改變出嚟，大家其實都好樂意支持你。
《1/1024》有幸得到大家支持，亦畀到更多信心我哋去做嚟緊出版嘅《一擊即中》。今次中英對照嘅設計，係希望將來拎去唔同地方參展，殺入外國市場。「香港製造」唔單止係用廣東話、講本地文化，而係當外國人講起呢隻Game，我哋可以好自豪咁講：
「呢隻Game係香港人設計架。」
