·
十年後，冇人會記得鋪Game嘅輸贏。
記得嘅只係，同呢班人玩Game好開心。有好多人都叫1024加返隻黑白牌，暗牌標明個選擇。因為驚有人擺粒粒嗰時會彈弓手出貓。
對我哋嚟講，派對又好、重策又好，遊戲嘅本質就係溝通。規則唔係禁止人犯規嘅法律，而係一個有共識嘅平台畀大家去交流去溝通。帶住有色眼鏡咁設立規則，其實係暗示每個玩家都有犯罪嘅可能。我哋唔係典獄長，我哋選擇相信玩家，遊戲先可以更加簡約優雅。
有人問過我哋隻Game點樣帶最好玩，我哋毫不猶豫就答，「大嗌1、2、3！一齊放粒粒就一定好反應」。
喺1024入面，分數根本唔係重點，只係估中嘅小小正回饋。好多時玩到最後，直頭冇計分都咁開心。我哋堅信一個好嘅遊戲，喺有能力令大家玩到唔在意勝負，過程開心就好。
十年後冇人會記得遊戲嘅輸贏，甚至連隻Game叫咩名都唔記得。我哋記得嘅只係，當時我同你玩得好開心。邊個係日久生情、邊個係一見鐘情、邊個情願打斜office樽水都唔換水。
或者呢啲先係喺AI時代，桌遊帶畀我哋，真正重要嘅嘢。🙋🏻♀️🙋🏻♂️
